第1條

第2條

第3條

第4條

歇熱的下晡，有幾个少年仔佇公園咧開講，雄雄看著阿明對橐袋仔撏一包白白的物件出來，問逐家敢敢試看覓。逐家攏足好玄，毋過心內感覺淡薄仔躊躇。

逐家攏毋敢應話。阿志徛出來講：「毋通！毒品會害死人！」阿明聽一下煞愣去，其他的人聽阿志按呢講嘛隨贊聲。

過無偌久，阿志𪜶學校舉辦一場毒品危害的講座。講師講：「毒品毋但傷身體，落尾凡勢連性命都會烏有去。」逐家聽甲耳仔覆覆覆，阿志決定放學欲苦勸阿明毋通繼續悾歁落去。

彼工，逐家又閣佇公園見面，𪜶相招拍籃球，那話仙那投球，走甲流汗流滴，耍甲真夠氣。毒品袂磕得，真正的快樂是朋友的陪伴佮健康的生活。

第1條

第2條

第3條

第4條

歇熱的下晡，有幾个少年仔佇公園咧開講，講甲當歡喜的時，雄雄看著阿明掩掩揜揜對橐袋仔撏一包親像糖仔粉的物件出來，細聲仔講：「這號物仔真神奇喔！恁敢敢試看覓？」唌人的毒品袂輸暗藏的陷阱，一步一步接近，雖罔逐家攏足好玄，想欲了解彼到底是啥物，毋過心內閣感覺真驚惶，嘛有淡薄仔躊躇。

所有的人，你看我，我看你，攏毋敢應話。這時阿志勇敢徛出來，表情誠堅定講：「毋通！這種物件會害死人！毒品千萬袂使沐！」阿明聽一下煞愣去，歹勢仔歹勢講：「無愛就莫，莫遐認真啦！」其他的人聽阿志按呢講嘛隨贊聲。其實逐家攏知影，磕毒品是違法閣危險的代誌，毒品嘛無法度予咱真正的快樂。

過無偌久，阿志𪜶學校拄好舉辦一場毒品危害的講座。講師共逐家說明毒品驚人的所在，簡報頂懸閣有食毒的人悲慘的故事呢！伊講：「毒品毋但傷身體，閣會害人弄家散宅，落尾凡勢連性命都會無去。」逐家聽甲耳仔覆覆覆，阿志聽了決定放學一定欲苦勸阿明毋通繼續悾歁，愛認清毒品背後是無盡的痛苦，若舞甲七少年八少年就愛包尿苴仔，彼人生就真正烏有去矣。

彼工，逐家又閣佇公園見面，這擺𪜶決定用健康的方式來享受生活。𪜶相招拍籃球，那話仙那投球，走甲流汗流滴，耍甲真夠氣。原來真正的快樂是朋友的陪伴佮健康的生活。「拒絕毒品，才有健康佮未來！」講師講的毋但是一句話，更加是一種信念，相信後擺𪜶的人生袂閣有毒品這个選項。

Q1 請問你平常時仔攏按怎敨放壓力？為啥物？請你講看覓。

Q2 請你分享恁學校攏按怎教恁反毒的觀念？有啥物活動？講予阮聽看覓。

我敨放壓力的方式足「特別」的喔！我會佮我眠床頂的「枕頭家族」開講話仙！𪜶袂嫌我囉唆，嘛袂罵我。見擺若是壓力傷大，抑是予大人罵，我就會凊彩揀一粒枕頭人，用譀古的聲音喝講：「夭壽喔！今仔日的考題出彼是啥碗糕啦？老師，你家己來寫看覓咧，時間根本無夠！」有當時仔嘛會假做老師，佯顛佯戇講：「小朋友！作業攏免寫，無要緊！」按呢那耍那講心事，壓力隨像消風的雞胿仔，攏無去矣！

阮學校有安排專家、警察抑是醫生來辦講座、放影片，分享毒品危害的實例。閣來佇校園內貼反毒海報來吸引學生的注意。紲落來，嘛配合課程，請社團表演情境劇，實際的體驗予阮印象較深。嘛捌舉辦「反毒」主題的畫圖比賽、作文比賽。學生因為欲比賽，攏會主動去揣資料，效果袂䆀。閣有喔！嘛有分手冊提轉厝，教家長按怎幫助囡仔拒絕毒品！