第1條

第2條

第3條

第4條

新聞當咧報花蓮地動的災情，講紲落來會有真濟地動尾，請民眾出入愛特別注意安全。

小妹問阿媽講：「是按怎哪會地動？」阿媽講：「地動就是地牛咧翻身啦！」

我紲喙講：「老師講臺灣厚地動是因為菲律賓海板塊欲櫼入去歐亞大陸板塊的過程中相挨，才會產生地動。地動的時愛緊覕落去桌仔跤揣掩護，閣愛共桌仔跤掠予牢，才會較安全。」

閣講平常時仔厝裡愛攢一寡緊急的時會用著的物件，親像礦泉水、食物、毯仔、急救的藥品、粗棉的手橐仔、手電仔、觱仔等等。地動是天災，咱無才調叫伊莫來，毋過咱會當做好防災的準備喔！

第1條

第2條

第3條

第4條

暗頓食飽，阮規家伙仔守佇客廳看新聞。主播講：「佇花蓮外海的在地時間四月初三早起七點三十五分，發生六點三級的大地動，紲落來會有真濟地動尾，今年的地動總數會比往年加真濟。花蓮外海琉球的海溝型地動，已經來到百年週期，雖然咱無法度預測，毋過咱會當做的就是做好防災的準備。」我佇新聞看著花蓮地動造成的災害，心肝頭足艱苦的，想著早起地動的時感覺塗跤攏咧趒，教室的電風幌甲足厲害，袂輸欲落落來，心肝內足驚惶的，規身軀起雞母皮。

小妹坐佇阿媽邊仔，手共牽咧，問講：「阿媽，是按怎哪會有地動？」阿媽講：「古早、古早，塗跤底蹛一隻足大隻的牛，叫做地牛。伊便若翻身，塗跤就會振動，所以地動就是地牛咧翻身啦！」哇！阿媽你足𠢕的呢！逐項攏知。阿媽講：「啊！無啦！我嘛是聽阮阿媽講的啦。」

我紲喙講：「阮老師講，臺灣厚地動是因為菲律賓海板塊欲櫼入去歐亞大陸板塊的過程中相挨，才會產生地動。地動欲來袂共咱通知，所以咱愛注意。地動的時若是佇室內，愛緊覕落去桌仔跤揣掩護，閣愛共桌仔跤掠予牢，才會較安全。」

平常時仔佇厝裡，咱愛攢一寡緊急的時會用著的物件，親像礦泉水、食物、毯仔、急救的藥品、粗棉的手橐仔、手電仔、觱仔……。地動是一種天災，咱無才調叫伊莫來，毋過咱會當做好防災的準備，共災害降低。

Q1 請問你若佇大賣場拄著地動，你會按怎做？請你講看覓。

Q2 是按怎愛有地動的防災演習？請你講看覓。                                                

我若是佇大賣場抑是公共場所拄著地動，我會先保持冷靜。因為是佇室內，我會緊揣看有桌仔抑是椅仔無，先覕落去桌仔跤揣掩護，閣愛共桌仔跤掠予牢才會較安全。等地動無咧搖矣，才揣物件保護頭殼，聽候放送的指示離開現場。地動的時，千萬毋通坐電梯、電動樓梯，咱嘛會當留佇原來的所在等候救援。

天災是無法度避免的，咱干焦會當加強防災的智識，先做好預防的措施佮練習，提升應變的能力，才會當減少地動造成的災害。地動發生的時，上重要的就是愛保護頭殼避免著傷。咱佇任何所在攏有可能會拄著地動，阿媽定講：「捷做手袂鈍。」咱若有訓練地動的防災演習，萬不二拄著地動的時，就袂生狂、毋知欲按怎才好，所以我認為地動的防災演習是真重要的！