第1條

第2條

第3條

第4條

今仔日上台語課的時，老師問阮講:「這馬地球暖化的現象真嚴重，恁逐家激頭腦想看覓，看有啥物想法佮做法會當予地球較慢暖化無？」逐家嗤舞嗤呲，目𥍉仔阮班就有足濟人相爭攑手欲回答。

阿華代先講：
「愛地球做環保，頭起先愛認真做資源回收，親像我平常時仔欲擲糞埽進前攏有先做分類。第一是紙類，舊冊、雜誌、廣告紙、報紙，若是紙箱仔就愛共踏予扁較實櫼，袂鎮位。第二是塑膠類，貯咖啡、牛奶、養樂多的塑膠罐仔。第三是銅管仔類，貯王梨、番麥的鐵罐仔。欲做回收，咱就毋通嫌費氣、毋通驚忝，做環保愛先對家己來做起。」

阿明紲落講：
「我的òo-bà是抾阿兄的來穿，我傷細領的衫會送予叔伯小弟穿。資源回收再利用，攏無拍損著。」

阿芳講：
「咱平常時仔會當加食寡菜蔬佮果子，莫食傷濟肉，較莫食進口的物件，按呢會當減少碳的排放，毋若環保閣省錢。」

阿政講：
「咱出門愛會記得紮環保的碗箸，毋若袂製造糞埽，閣會當減輕地球的負擔！」

落尾，老師講：「買電器用品的時，愛買有節能標章的較省電。平常時仔無咧使用的電器，插頭愛剝掉，較省電閣安全。親像電池愛另外處理，袂當烏白擲，才袂造成環境的汙染，恁厝裡的電池嘛會當共提來學校回收喔！出門莫駛車，盡量坐大眾運輸工具，會當改善空氣的品質。地球干焦一粒，欲傳千萬代，咱愛用心保護，節能減碳骨力做，生活環境才會好！」

Q1 請問你佇學校老師教你按怎做環保？請你講看覓。

Q2 請問你敢有去海邊仔抾糞埽的經驗？請你講看覓。

老師有講過，做環保愛對家己來做起。平常時仔會當加食一寡在地的食材，較莫食進口的物件，莫食傷濟肉，減少碳的排放。出去外口盡量坐大眾運輸交通工具。佇室內若感覺會熱，開冷氣溫度莫傷低，會當閣開電風落吹，按呢毋但會較涼，嘛較省電。

我有去過海邊仔抾糞埽。彼工海邊仔有足濟塑膠罐仔、銅管仔，有人啉飲料，空罐仔就凊彩擲佇塗跤，閣有塑膠袋仔佇遐飛來飛去。我感覺這个媠媠的所在，予無公德心的人舞甲遐爾垃圾，足無奈的，阮就共遐的糞埽抾抾咧提去擲掉。我希望來海邊仔的人攏會當紲手做環保，留一个清氣的所在予別人，愛護地球做環保是咱逐家的責任。