第1條

第2條

第3條

第4條

今仔日較早精神，時間較冗剩，毋免趕狂，冊包愛紮的物件攏款予好勢，沓沓仔食早頓，食飽就攢欲來去學校讀冊矣！出門看著天青青、雲白白，天氣遮爾好，今仔日我規工的心情一定嘛會足好的！

行到學校頭前的十字路口，看著學校的愛心志工，𪜶無論是日頭赤焱焱抑是透風落雨，時間若到就出現，毋驚艱苦徛佇路口指揮交通，干焦為著欲予阮遮的學生囡仔會當安全去到學校。我咧等青紅燈的時，志工媽媽用旗仔共阮閘咧，講：「這馬是紅燈，上班時間車真濟，恁愛較細膩咧！」透早就聽著遮爾溫暖的話語，心情足好的！

若講著阮學校的志工隊真正是呵咾甲會觸舌，出力閣出錢，三不五時就有人會捐錢予阮學校的跤球隊，贊助𪜶出去比賽的所費。予選手去參加比賽的時，會當食好閣睏好，精神飽滇才有體力佮人拚輸贏，展現出𪜶的專長佮實力。因為有愛心志工的加油佮支持，嘿！毋是我咧臭彈，阮學校的跤球隊是名聲透京城呢！

青燈矣！我拄欲過車路的時，看著一个阿婆行路無啥好勢，我的家婆性隨夯起來，我共伊講：「阿婆！等一下我扶你過車路。」阿婆隨應我講：「好，勞煩你囉！」我扶阿婆行過車路，閣共伊講：「阿婆，寬寬仔行，毋通跋倒喔！」行到對面的時，阿婆共我講多謝，閣講我人媠心嘛媠。我予伊呵咾一下，尻川強欲翹起來。彼時攑頭看著白雲袂輸咧對我笑呢，予我心花齊開！原來會當幫助人，是一項遮爾快樂的代誌！

Q1 請問佇學校的路口看著志工的時有啥物感受？請你講看覓。

Q2 你以後若有機會做志工，你敢會去參與？為啥物？請你講看覓。

我感覺𪜶足有愛心的，所以透早我若拄著顧路的愛心志工，攏會共𪜶講一句多謝。簡單的一句話，有我心內深深的感謝，因為無論是日頭赤焱焱抑是透風落雨的日子，𪜶攏會準時徛佇遐，干焦為著欲予阮遮的學生囡仔平安去到學校讀冊。志工真正足辛苦的，𪜶服務奉獻的精神值得我學習。

我會。因為我讀一年仔的時，第三工放學，阮阿母就訓練我佮表姊同齊轉去。我想欲緊轉到厝，就共志工媽媽閘路用的旗仔掰開。雄雄傱出去車路，險仔予車挵著，是志工媽媽傱出去共我抱轉來，我才會當平安無代誌。所以後擺我若有機會，嘛會去做志工幫助人，共這份愛傳落去。