第1條

第2條

第3條

第4條

有一工放學了後，阿華佮同學鬥陣行路欲轉去厝裡。經過公園，當當逐家有講有笑的時陣，煞雄雄聽著阿明喝一聲「啊！哪有一隻鳥仔佇遐咧！」逐家緊走過去看。斟酌一下看，原來有一隻鳥仔落佇樹仔跤，無啥會振動。阿華問講：「伊敢是著傷？敢閣會當飛？」阿美講：「空喙看起來真傷重，咱是欲按怎？」同學就十喙九尻川討論起來。

阿美跍佇鳥仔的邊仔，感覺真煩惱的款。這時陣阿明提議講：「咱共伊送去動物病院予醫生看。」阿美幌頭講：「莫啦，送去警察局較著！大人𪜶會處理。」阿志講：「無，規氣咱共掠轉去囥佇樹仔頂，鳥仔囝的阿母若揣無囡仔會真艱苦呢！」上尾，阿華用雙手共鳥仔捧咧講：「我想，我先共伊𤆬轉去厝裡好好仔照顧才閣講。」逐家聽了嘛攏頕頭表示同意。

佇路裡，阿華真煩惱厝裡的序大人會受氣，無欲予伊照顧鳥仔。無疑悟轉到厝，阿母緊去攢一跤箱仔予鳥仔做岫通歇睏，阿華嘛緊去提藥仔來共鳥仔糊空喙。阿爸無第二句話就走出去買鳥仔飼料，驚鳥仔無物件食會無元氣，規家伙仔攏足用心咧照顧這隻鳥仔。

半個月後，鳥仔已經沓沓仔恢復健康，翼股的空喙嘛好完全矣，伊逐工佇厝裡的窗仔門邊飛來飛去，親像咧想厝的款。阿母講愛共鳥仔放轉去大自然才著，遐才是伊的厝。雖然真毋甘，毋過，𪜶嘛是利用歇睏日，鬥陣共鳥仔𤆬轉去放佇山林，希望伊莫閣著傷，一切平安！

Q1 請你佮阮分享一種你上佮意的動物，佮意的理由是啥物？請你講看覓。

Q2 若準講你嘛佇路邊看著一隻著傷的貓仔，你會按怎做？請講予阮聽看覓。

我上佮意的動物就是長頸鹿。我足欣羨長頸鹿長躼躼的跤，看起來有夠風神。因為我較細粒子，所以見擺若是去看表演抑是看鬧熱攏真食虧，一直躡跤尾閣看無啥會著，真厭氣。我若是會當像長頸鹿遐懸，凡勢穿衫嘛會加真好看呢！

若準我看著著傷的貓仔，我會先檢查四箍圍仔的環境，確定家己袂予車挵著、無危險，才緊去共伊抱去邊仔較安全的所在，盡量莫去磕著伊的空喙。我毋敢共伊𤆬轉厝，阮小妹過敏，阿母講袂使飼動物。我會敲電話予動物之家，抑是揣動物病院鬥相共，予伊接受專業的治療。