第1條

第2條

第3條

第4條

舊曆五月初五是五日節，是規年迵天重要的日子。這工逐家攏真歡喜，因為阮囡仔人毋免讀冊；阿母五日節有領獎金；厝裡大細漢攏轉來團圓，阿媽縛粽無閒𩑾𩑾嘛歡喜甲。阿嬸紩香芳，阿兄佮小弟咧徛卵，阿公佮阿爸共艾草、榕仔葉、茅仔草縛鬥陣插佇門斗邊，講這是五日節的風俗，插榕較勇龍，插艾會勇健。

我這个好鼻師，早就鼻著芳貢貢的味，隨傱去灶跤看，原來是阿媽佮阿母咧縛粽，芳味衝甲規厝間。哇！有我上愛食的香菇、鹹卵仁、滷肉閣有蝦仁……干焦鼻著芳味，我的喙瀾就強欲津落來，苦無會當隨食著。

雄雄聽著阿公喝講欲𤆬阮去看扒龍船比賽，我三步行兩步跳，欲緊去看人扒龍船。去到位的時，人是插插插，挵鼓的聲、加油的聲有夠鬧熱的！阿公交待阮徛佇岸邊愛細膩，毋通跋落水喔！

食暗的時，我緊手剝一粒粽欲食，阿公喝聲講：「小等一下！」講欲考阮五日節的風俗，講著才會當食粽。阿嬸講掛香芳、阿母講縛肉粽、小弟講徛卵、阿叔講午時水，阿兄講扒龍船。謼！恁共我欲講的攏講了矣，害人無通講矣！這時阿爸一直共我𥍉目，手閣一直比。啊！我知矣！插榕較勇龍，插艾會勇健。阿媽呵咾我哪會遮𠢕！講遮的粽在我食。我一喙咬落去隨講：「喔！阿媽，你的手路實在有夠讚的啦！這粽會害人食毋知飽呢！」阿媽笑甲喙仔裂獅獅。規口灶做伙食飯的感覺誠好！肉粽哺著鹹芳仔鹹芳，鹼粽食著𩚨𩚨閣甜甜，心肝内有一種幸福的滋味！

Q1 請問你上愛食啥物粽？請你講看覓。                                          

Q2 請問你感覺傳統節日的風俗佮活動，佇現代社會敢有存在的意義？請你講看覓。

我上愛食阮阿媽縛的肉粽，三層肉有滷過，哺著鹹芳仔鹹芳。家己縛的粽，食材處理的過程較衛生，內面包的料攏是我愛食的，外口無地買。阮阿媽縛的粽加一味，有幸福的滋味！

我感覺傳統節日的風俗佮活動有伊存在的必要。各地方的風俗佮活動代表在地人生活的沓沓滴滴，這就是在地文化，嘛是在地的特色，咱愛好好仔寶惜。現代人工課無閒，人際關係嘛較疏遠，透過傳統節日的風俗佮活動，會當共厝裡的人感情牽做伙。節日的風俗佮活動是先民的智慧佮經驗，老人若毋講古，少年就毋捌寶。在地文化佮特色，咱就愛代代相傳，才袂失傳。