第1條

第2條

第3條

第4條

「緊咧！緊咧！喔！頭前的好兄弟是咧趖啥啦？」七月初一這工鬼門一開，逐家攏那喝那傱，攏想欲拚頭班的去人間食腥臊兼𨑨迌。我嘛佇陰曹地府等規年貼貼矣！這改愛較頂真咧，毋通像在生彼陣頏天頏天，不時揣路揣甲戇面。毋過，為著欲緊去揣物件來孝孤，看著逐家硞硞傱，我姑不而將嘛干焦會當綴咧傱。

一目𥍉就到七月十四放水燈這工，我這箍枵鬼敢若賰無偌濟浪溜嗹的日子矣。本底暗摸摸的海邊，這陣是光焱焱，海風咻咻叫，人佮鬼是濟甲洘秫秫，我踅甲霧嗄嗄！看𪜶咧放水燈，喙閣那踅踅唸，敢是為著欲送走惡運，抑是咧同情阮會揣無路咧？我有淡薄仔心酸，毋知彼內底敢有我的親人？

Mh！我鼻著芳味矣！喔！是陽世間的人佇七月十五中元這工咧辦普渡大拜拜。廟埕的鼓仔燈吊甲滿滿是，人濟甲插插插，規桌頂插旗仔閣插香的腥臊，害我這箍枵鬼看甲喙瀾㴙㴙滴，好食物捎咧拚勢推。邊仔的好兄弟講：「遮的好料的，攏予咱囫落腹肚底矣，賰四秀仔佮予人啉迵海的涼的，就留咧予遐的趖跤趖手的去捽。」好佳哉我跤手猛掠，才有通食甲粗飽、粗飽。

七月底鬼門欲關矣！陽間的人咧辦搶孤的活動。𪜶用規個月的時間搭孤棚，上面頂閣囥足濟好料的，共柴箍抹牛油予人𬦰起去搶上尾溜彼支順風旗，聽講搶著的人會有好運。有人𬦰起去閣摔落來，一陣人挨挨陣陣咧看鬧熱。喔！我嘛愛緊來搶食，這是我佇陽世間的上尾一頓矣！先共氣力攢予便，紲落就愛閣等一年囉！

Q1 請問你對搶孤這个活動有啥物想法？請你講看覓。

Q2 請問你對拜拜、燒金紙的看法？請你講看覓。                                          

阮老師是捌共阮講過，彼是對人佮好兄弟的疼心，有感恩、尊重佮布施的意義。佇以早移民開墾的時陣，𪜶若毋是拄著天災，就是因為土地冤家抑是破病煞過身，落尾就變成無主的孤魂。後代的人因為同情、感恩，就佇咱人七月辦搶孤的活動。除了予好兄弟食腥臊，拜煞的祭品嘛會分予逐家食，這對艱苦人嘛是一款無講出喙的幫贊佮疼心，我感覺真好。

阮社區邊仔有一間土地公廟，三不五時就有人去遐拜拜、燒金紙。便若行對遐過，我攏會雙手合掌拜土地公，請伊託夢予信徒，拜託𪜶莫閣燒金紙，因為阮蹛佇邊仔攏綴咧欶香煙，真正足艱苦的。空氣汙染的問題閣遐食力，就準講是燒環保金，嘛無人敢頓胸坎掛保證，講燒環保金無問題。人講誠意食水甜，我的看法是拜拜莫燒金紙上蓋好啦！