第1條

第2條

第3條

第4條

歇熱的時，阿爸駛車載阮轉去草地看阿公、阿媽，欲來和𪜶做伴幾工仔。車駛到位，阿公、阿媽已經佇門口埕咧等阮囉！我車門一下開，三步做兩步行，緊欲來去共阿媽攬一下，小妹已經傱進前共阿媽攬牢咧矣。

暗頓阿媽攢甲足豐沛，哇！攏是我愛食的。我共阿媽講：「阿媽！你袂輸是我腹肚內的蝒蟲咧。」阿媽回我：「加講的，你是我的糖霜丸，愛食啥物我攏嘛知。」規桌頂的菜，有炕肉、虱目魚、蝦仔捲……。我隨提手機仔起來翕，阿媽講：「人猶未食，手機仔代先食喔！」我講：「阿媽，人我欲展寶一下，佇面冊頂懸分享動態，紲落去我就那食那回line。」小妹平板提出來，那食那看影片；阿爸、阿母嘛用手機仔咧聯絡代誌。阿公講：「恁和食飯嘛予手機仔縛死死，真毋是款呢！手機仔收起來啦！」

我和小妹上愛佮阿媽睏佇總鋪𤲍燒，身軀洗好，小妹仔提平板佇總鋪看影片。我手機仔耍甲當歡喜，阿媽入來房間看著隨講：「謼！毋通一日到暗手機仔不離身，房間的電火嘛無夠光，按呢目睭會拍歹啦！緊收起來！若無我欲來去共恁老爸投喔！」小妹應講：「好啦！人隨收起來。」

隔工，逐家佇客廳看電視，小妹一直挼目睭，閣講伊的目睭霧霧看袂明。阿媽講：「定著是手機仔耍傷久，緊𤆬去予醫生看覓咧。」阿母隨𤆬小妹去眼科，醫生講：「毋通過度使用3C 產品，用三十分鐘，愛歇睏十分鐘。袂使佇傷暗的所在用手機仔，按呢無夠光，目睭會拍歹。」自彼工起，阮攏乖乖仔聽醫生的話，斟酌咧保護目睭，攏毋敢假痟。

Q1 請問你平常時仔按怎安排使用手機仔的時間？請你講看覓。

Q2 請問你感覺學生囡仔敢需要用手機仔？請你講看覓。

阿母佮我有約束，平常時仔上課的時間袂當用手機仔；歇睏時仔，一工會當用三點鐘，毋過用三十分鐘了後，一定愛歇睏十分鐘。我若違背約束，手機仔就愛停用一個月。所以我攏足守信用，照品照行。而且學校老師嘛有共阮講：「目睭真重要！一定愛好好仔照顧，人生才會是彩色的。」

其實我感覺嘛無一定愛有手機仔。親像我上、下課攏坐校車，阿母若欲揣我，學校、補習班一定有法度聯絡著我。而且我平常時仔上課，假日嘛愛補習、寫作業，逐工攏無閒𩑾𩑾，睏都袂赴矣，哪有彼號冗剩時間耍手機仔！同學就是我的朋友，佇學校逐工攏會見面，有啥物代誌佇學校講就會使矣，我感覺嘛無需要一定愛用手機仔聯絡。