第1條

第2條

第3條

第4條

歇熱進前，阿爸興𩑾𩑾講阮姊妹仔這學期表現甲真好，為著欲獎勵阮，伊欲𤆬阮規家伙仔去旅行。聽著這个消息，阮歡喜甲喙仔裂獅獅，隨問講欲去佗位。阿爸叫阮鬥陣揣資料，做伙計畫旅行的大細項代誌。阿母緊上網，我佮小妹嘛緊鬥出意見，阮有講有笑，最後決定這改欲去出名的火燒島𨑨迌，逐家心內攏充滿期待。

網路講若去火燒島定著愛去藏水沫，聽講會耍甲連飯都袂顧得食。閣真正有影！彼工，導遊頓胸坎掛保證，推薦阮去藏水沫。佇海底有慢趖的海龜、古錐的海星、刺夯夯的海膽，嘛有彼號媠甲予人目睭毋甘𥍉的珊瑚，閣有足濟五花十色的魚仔佇阮身軀邊泅來泅去，袂輸咧和阮相借問咧！遮爾濟海中生物我攏毋捌看過，逐項攏足神奇的！這改真正卯死矣！

後來，教練神祕仔神祕講：「好酒沉甕底喔！這馬咱來去看火燒島上出名的「戇仔鯊」囉！」逐家舞規半晡才去到位，想袂到彼戇仔鯊哪會遐大隻啦！是欲驚死人喔？我看一下隨軟跤，規身軀軟𩛩𩛩，心內暗想，若予咬著，毋就穩死無活的？

我是驚甲咇咇掣，無疑悟煞吼甲大細聲「啊！阿母！人無愛看鯊魚，我欲轉去啦！我哩咧，救人喔！」我吼甲牽死雞仔腸，強欲袂喘氣。阿母共我攬牢牢嘛是無我法，只好請教練緊共我搝起去竹棑仔頂歇睏。阿妹仔佇邊仔笑甲𢯾腹肚，實在是真見笑，毋過嘛會使講是我上難忘的旅遊記持啦！

Q1 請問你攏用啥物方式記錄旅遊？為啥物？請你講看覓。

Q2 請你分享一擺恁規家伙仔去旅行的經驗，請講予阮聽看覓。

我會寫「旅行尪仔冊」。逐擺旅行結束，我會畫圖，用趣味的對話方式寫出難忘的代誌，譬論講，食著薟甲擋袂牢的火鍋，食甲規家伙仔落屎。嘛捌揣無路，規點鐘佇同一个所在拍金龜翱……。我感覺用畫尪仔冊的方式比寫日記閣較活潑，除了記錄，我嘛會提出來佮朋友分享，這嘛是分享快樂的方式啊！

彼擺阮是去七股的鹽山，印象上深的是細漢小弟看著彼粒白甲像雪的鹽山就喝講：「哇！這敢是雪？」阿母笑笑仔講：「這是鹽，摸看覓你就知！」結果，小弟真正走倚去，閣偷偷仔用喙舌去舐，隨大聲唉一聲：「啊～活欲鹹死！」逐家攏笑甲強欲反過。鹽山邊仔有一个鹽工藝DIY的活動，阮規家伙仔鬥陣做鹽罐。阿母做一个愛心，講：「向望咱規家平安健康！」鹽山對我來講，毋但好耍，嘛是上溫暖的記持。