第1條

第2條

第3條

第4條

頂禮拜天氣誠好，阿公佮阿媽𤆬阮姊弟仔去舊街𨑨迌，街仔路兩爿攏有人排擔做生理。有真濟人佮阮仝款那看那買，一觸久仔，阮就一人捾一包矣！阿公閣袂輸是導覽員，那行那共阮紹介舊街的歷史故事，予阮感覺逐項攏足心適。

若毋是阿弟仔喝枵、哀跤酸，阮煞攏無智覺著腹肚底的枵鬼蟲咧蟯蟯旋。頭前有一間店咧賣臺南摵仔麵，阮緊坐落來歇喘兼食麵。頭家講：「我這湯頭是用大骨濫祖傳的祕方沓沓仔炕，外位仔是食袂著的喔！」Mh！有影呢！彼唌人的芳味，予人苦袂當緊共彼湯頭灌落喉。心內才咧想，就看著阿弟仔那吐喙舌手那擛風喝講：「燒！燒！燒啦！」唉！真正是食緊挵破碗，佳哉我有勻勻仔抐予涼才食。

顧腹肚嘛著顧佛祖，食飽了後，阮就去廟寺拜拜。阿公講：「這間廟是頂港有名聲，下港上出名的媽祖廟，有拜有保庇喔！」阿弟仔隨雙手合掌踅踅唸講：「拜託媽祖婆予我考試著第一名。」我心內想講，小弟哪通為難媽祖婆啦！就細細聲仔講：「顧耍貧惰讀冊，想欲提第一名，睏罔睏莫陷眠啦！」阿公隨講：「有夢上媠，美夢相隨。」阿媽嘛講：「咱對阿弟仔愛有信心。」

一出廟門，看著天邊的鳥仔那飛那遠，若像咧佮阮講再會。本底紺色的天，袂輸會變魔術咧，目𥍉仔就變彩色的紅霞來佮阮相借問，阮緊提手機仔共這美麗的景色翕落來。我實在是足感謝有阿公、阿媽佮小弟的陪伴，予我有一个歡喜的歇睏日。

Q1 請問你敢會愛踅舊街？為啥物？請你講看覓。                                 

Q2 請問你去踅街，敢捌發生啥物予你記持上深的代誌？請你講看覓。

我誠愛踅舊街，因為彼嘛是一款消敨壓力的方式，會當那行那食，予我感覺真自由，嘛免聽大人佇邊仔踅踅唸講：「囡仔人食物件愛乖乖仔坐予好勢，才袂予人笑你無禮貌。」踅舊街，毋若自由閣心適，有食閣有掠，我上愛！

有喔！有一改是禮拜，人𤲍人，我雄雄感覺敢若有人咧搭我的肩胛頭。我掣一趒，想講凡勢是人濟的關係，就無插伊。欲哪知閣相連紲共我搭幾若下，我心狂火著，一越頭就出力共揌落。結果，彼个人講：「你的揹仔開開，物件那行那落，我一直喝，你攏無聽著。」喔！我彼改真正是歹勢甲一直共會失禮。這就是我踅街發生過記持上深的代誌。