第1條

第2條

第3條

第4條

拜三暗頭仔，阮規家伙仔坐佇客廳，手機仔攑咧一直掰，閣那咧注意著電視新聞的氣象報導。主播共逐家講：「這擺的風颱，風會真透、雨會真大，規臺灣攏是風颱會掃著的範圍，千萬愛注意安全，細膩無蝕本。」阿爸面憂面結講：「風颱看起來不止仔大，毋知會影響著咱袂？花蓮彼爿已經咧落大雨矣！」小妹看起來真緊張，共阿爸講：「我干焦想欲知影明仔載敢有歇睏！」

我佮小妹攏真期待明仔載免上課，向望會當放假。過無偌久，手機仔跳出通知，電視主播嘛咧報上新的消息，規臺灣攏免上班上課。」聽著這个消息，我隨歡喜甲𧿳𧿳跳講：「啊！免去學校矣！讚啦！」小妹嘛𬦰起來搖尻川花，閣趁著一工矣，真正卯死矣！這時阿爸猶是交代阮：「雖罔免去上課，咱嘛愛注意安全，毋通四界拋拋走喔！」

隔轉工，我睏甲欲倚十點才精神，看對窗仔外去，想講敢真正有風颱？今無風無搖，日頭閣遐爾猛咧！小妹想欲敲電話招𪜶同學看是欲去唱歌抑是欲去看電影。阿母毋答應，閣叫阮看新聞，原來雖然北部無風雨，毋過東部地區已經做大水，有水崩山，災情不止仔食力，聽著按呢，煞感覺心肝頭慒慒。

我坐佇電腦頭前，看網路頂懸討論甲鬧熱𩑾𩑾，有人佇社群批評講：「政府烏白亂歇睏，害頭家白白了真濟錢！」嘛有人反對這種講法，叫逐家毋通傷自私，家己蹛的所在無代誌，無代表所有的人攏無需要。我看甲霧嗄嗄，就共阿爸講：「人濟話就濟，三色人講五色話，風颱到底愛歇睏無，欲做這種決定無簡單！」阿爸頕頭應講：到今你才知！」

Q1 你敢有愛歇風颱假，為啥物？請你講看覓。                                     

Q2 請你分享一擺佮風颱有關係的經驗，講予阮聽看覓。

我愛歇風颱假，彼袂輸是大自然送予咱的意外禮物，予逐家佇無閒𩑾𩑾的生活中通喘一口氣，體驗無仝的歇睏日。風颱來，逐家關門閂戶，規家伙仔攏無法度出門，有時閣停電，連手機仔電動嘛無通拍，就鬥陣佇客廳開講話仙，聯絡感情。這款沓沓仔講天講地的氣氛，真正是加出來的風颱假才有法度體會著的，我真珍惜。

有一擺歇熱，我去阿公兜，煞去拄著做風颱，透早我一下精神，發現阿公兜已經變成「小島」，門外攏淹大水。隔壁阿公的跤踏車浮佇水頂，親像一隻海賊船。我真儑面，閣笑笑仔講：「哇！這袂輸咧搬電影咧！」我共家己當做冒險隊長，靴管穿咧，掃帚攑咧，假做我的武器，閣佮小弟用枕頭搭一座「枕頭避難所」，耍甲真歡喜！