第1條

第2條

第3條

第4條

阮社區的里民活動中心，最近開一个「青春綴我來」的課程。上愛學東學西的阿媽，一下知影這个消息就隨去報名，閣招厝邊兜的朋友鬥陣去上課。阿媽講：「老歲仔人愛綴會著時代，活到老、學到老，才袂磕袂著就怨天怨地，驚家己佇厝食了米、坐歹椅，顧人怨。」

課程一下開始，是請兩位男女老師徛佇上頭前，教逐家振動身軀。音樂一下起磅，老師就喝講：「阿公！阿媽！欲少年就綴我來喔！」就按呢有樣看樣，伸跤出手、遮幌遐扭，這陣老罔老閣會哺塗豆的老寶貝攏扭甲笑咍咍。阿媽共嬸婆講：「咱若逐工骨力扭，就免煩惱痠骨輪、疼骨節矣。」嬸婆講：「這嘛毋知是跳啥物舞，閣不止仔趣味，蓋心適呢！」

煞落老師提色紙教逐家拗。阿媽目鏡掛咧，誠拍拚咧拗鳥仔形，伊綴老師講的步數沓沓仔拗，勻勻仔看巡有拗好勢無。彼款頂真、驚重耽的形，實在是有夠古錐。老師講免驚跤手慢鈍，咱步步照起工，頭腦那激、手那振動，較袂失智喔！

中晝十二點有人送餐來矣！菜色有魚、有肉、有菜佮。彼陣老古錐那食那開講，對做運動講甲拗紙，歡喜的笑聲滿厝間。阿媽講：「誠好空！有食閣有掠。」嬸婆講：「佳哉你有招我來，這款學東學西的老人生活，就是我想欲愛的。外表的青春少年咱是袂赴市，毋過趁歡喜是愛綴會著，後擺愛閣共我招喔！」逐家聽著了後，攏講向望會當閣享受鬥陣學習的快樂。

Q1 請問你較愛佮啥物款的老大人做伙，為啥物？請你講看覓。

Q2 照你按呢講，你佮阿媽的感情真好。請你分享阿媽的趣味代。

我較愛佮好參詳的老大人做伙。像阮阿媽彼款的性地好，袂嫌東嫌西、袂踅踅唸，人若有代誌共伊請教，伊攏真有耐心，佮這款老大人做伙，心情會較快活。有一款無愛出門行踏的，閣講人愛四界拋拋走，有身苦病疼欲𤆬伊去予醫生看，伊毋去閣講無人關心伊，這款的老人會予人驚。雖然我知影人攏會老，愛將心比心，毋過我感覺老大人像阮阿媽彼型的較古錐。

阮拄搬去新社區蹛的時陣，里長姆仔就招阿媽綴社區辦的活動去遊覽。遊覽車佇高速公路的休息站予𪜶歇睏去便所。阿媽講外口風傷透，請里長姆仔先上車，免等伊。哪知導遊點人數的時陣，仙算就毋著，落尾才佇另外一台遊覽車揣著阿媽。逐家攏講傷譀，阿媽講伊看彼車身色水仝款就上車矣。規車的人攏咧掰手機仔，嘛毋知伊是對佗位來的。自彼改了後，阮就毋敢閣予阿媽家己綴人出去𨑨迌矣。