第1條

第2條

第3條

第4條

開學第一工落大雨，阿爸的車閣佇路裡歹去，我煞袂赴準時去上課。佇教室門口，我驚甲面仔青恂恂，想講毋知敢會予老師罵甲臭頭？規身軀攏起交懍恂，足想欲揣一个所在覕起來。好佳哉當當咧想無步的時，老師笑頭笑面，用溫柔的氣口共我講：「免緊張！緊入來教室，歡迎你喔！」

有一擺，我去參加英語講古比賽，老師一擺一擺陪我練習。有時練袂好勢，我會家己佇邊仔使性地。老師真有耐性，寬寬仔鼓勵我愛堅持，講戲棚跤徛久人的。可能傷過緊張，想袂到最後煞無著等。我艱苦甲嘛嘛吼，老師隨行倚來共我攬牢咧講：「老師了解你的感覺，想欲吼就吼，因為這是咱拍拚過的證據。」

隔轉工，老師佇聯絡簿寫規大篇，開破我講：「會跋才會大，共失敗當做後擺的肥底，咱鬥陣來對經驗中揣出比賽的鋩角，定著會愈來愈進步！」彼本寫甲滇滇滇的聯絡簿到今我猶留咧，成做我上珍惜的紀念。

歇熱進前，老師講伊欲調去別間學校。上尾一工放學的時，老師徛佇學校的門口佮逐家擛手講再會。我真毋甘，那行那越頭看，彼時佮老師開講話仙的情景、老師徛佇烏枋前寫字的形影，老師陪阮鬥陣走標走甲怦怦喘，老師共我攬咧、安慰我的溫度是遐邇仔燒烙，我永遠攏會囥佇心肝底。老師！感謝你！再會！

Q1 你上佮意的老師是啥人？為啥物？請你講看覓。                                

Q2 若是用一種動物形容恁老師，你會選佗一種，為啥物？請講予阮聽看覓。

我上佮意鄭老師，一个隨時會變魔術的神奇老師。伊定定共課本的故事成做真人舞台戲，譬論講教著《小王子》，上課的時，伊竟然戴金色的假頭毛來上課，徛佇台仔頂共教室變做宇宙，予阮逐家笑甲喙仔裂獅獅。 伊閣有一个神祕的「百寶袋」，逐工攏會抽一張彩券出來，內容是寫阮班做啥物好代。親像講「今仔日阿明借鉛筆予同學、阿英牽路邊的阿媽過車路！」阮規班攏真期待看著老師是寫阮做啥物好代誌，嘛真願意加做好代誌。

若欲用一種動物形容老師，我想我會選「貓頭鳥」。貓頭鳥的目睭金金金，連暗漠漠的樹林內有啥物動靜攏隨智覺會著。阮老師的目睭有法度掠著阮的表情、掌握阮的心情，作業無寫、上課踅神、偷看尪仔冊，攏難逃伊的法眼，看甲清清楚楚。老師袂隨罵阮，總是等待適當的時機才講道理予阮聽。就親像貓頭鳥遐爾冷靜、充滿智慧，嘛佇看袂著的所在恬恬仔守護阮。