第1條

第2條

第3條

第4條

頂禮拜阮去「六福村」校外教學。前一暗我的心情就像阮阿媽講的，頭一擺做大家，跤手肉慄慄掣，緊張閣歡喜，規暝攏睏袂落眠，精神好甲袂講得。因為我毋捌去過「六福村」，尤其是想著欲佮老師和同學做伙去，我閣較期待。

彼工阮坐佇遊覽車頂懸，窗仔外高速公路的風景就像放電影仝款，一幕過一幕。車內歡喜的笑聲、滾絞的音樂聲，雖然是吵甲強欲臭耳聾，毋過無人會受氣，準講有同學唱甲袂輸像牛車駛落崎，ki-ki-kuāinn-kuāinn、si-si-suāinnsuāinn，阮嘛是聽甲笑咍咍，相爭拍噗仔。

一下到「六福村」，老師就先𤆬阮去坐細台火車。規路攏有動物咧佮阮相借問，有生做橫霸霸的河馬、色水豔麗的孔雀，閣有一隻山豬綴佇阮的車邊，雄雄倚來唚阿玲的手，伊驚甲吱吱叫。阮笑講：「山豬去煞 (sannh) 著你啦！」伊氣甲規面膨獅獅。老師講，用看的就好，手袂當伸出去，毋通放外外、激怐怐，安全第一。

紲落阮去坐飛天車，寢頭逐家攏喝：「衝啊！衝啊！衝啊！我啥物攏毋驚啦！」結果一落來就吐甲面仔青恂恂，滿天全金條，欲捎無半條，連徛就徛袂在，實在是有夠落氣。落尾就換去坐『急流泛舟』，雖罔予水噴甲規身軀澹漉漉，毋過嘛是排隊繼續耍，享受對懸懸的所在，咻一下跙落來的刺激。

有影是快樂的時間上緊過，來的時陣歡頭喜面、唏嚇叫，欲轉去煞憂頭結面、恬tsih-tsih。阮做伙約束後擺欲閣來，嘛期待後一擺的校外教學較緊來。　

Q1 請問你上愛去佗位𨑨迌？為啥物？請你講看覓。

Q2 請問你感覺出門去𨑨迌，上重要的代誌是啥物？為啥物？請你講看覓。

我上愛去溪頭，遐嘛是阮規家伙仔上愛去的所在。因為阿母講遐是伊佮阮阿爸定情的所在，樹仔濟、空氣好，會當享受芬多精。阮若想著序大佇遐散步、談情說愛的情景，就感覺足浪漫的。佇溪頭若嫌無議量，閣會當踅彼內底的妖怪村，罔買、罔食、罔看。運氣若好，閣會當看著唱歌、跳舞、變魔術的表演，所以我上愛去溪頭。

我感覺安全上重要！因為出門去𨑨迌，是一件歡喜的代誌，安全若顧有好勢，𨑨迌才會輕鬆、才有意義。阮老師佮序大人上捷共阮吩咐的就是愛注意安全，尤其是規陣人同齊出去，絕對袂當家己孤一个人行動，欲做啥物代誌，一定攏愛招伴，嘛愛斟酌四箍圍仔的地理環境。拄著危險的時陣愛冷靜，毋通佇生份的所在烏白傱。所以我感覺出門去𨑨迌的時，安全上重要。