第1條

第2條

第3條

第4條

拜五彼工，第二節下課的時陣，老師佇學校的便所外口，看著學生阿美佇水槽仔遐那洗手那挼目睭，敢若咧哭的款，就問阿美是按怎？哪會咧哭？哪知阿美想著進前佮阿玲鬥陣的沓沓滴滴，煞未曾開喙，目屎就硞硞輾，愈哭愈傷心。

老師看伊哭甲毋是勢，就𤆬伊去樹仔跤，那提衛生紙予伊拭目屎那聽伊講。伊講阿玲佇同學的面頭前講伊的歹話，害伊足鬱卒的，伊就佮阿玲相罵。老師共安慰講：「人佮人生成攏會因為一寡代誌，門扇枋鬥袂峇起冤家。你小冷靜一下，想看覓咧！敢是有啥物誤會？」

阿美講伊佮阿玲感情誠好，袂輸司公仔象桮，定定做伙開講、相招去便所、同齊去散步，若像是褲帶結相倚。嘛毋知今仔日阿玲煞雄雄起呸面，變面若咧掀冊，喝變就變、喝扯就扯，予伊捎無頭摠，無彩𪜶是死忠兼換帖的má-tsih。老師共伊講，莫艱苦，咱做伙來敨這个結。

上課矣！老師就講伊囡仔時的故事予逐家聽。伊講彼當陣伊若做毋著代誌，會會失禮，同學就會原諒伊，袂佮伊計較。這馬𪜶大漢矣，到今猶是好朋友。下課了後，阿玲就共阿美講，伊是氣阿美烏白反伊的鉛筆篋仔。阿美緊講歹勢，就按呢，𪜶兩个就閣佮以早仝款，有講有笑矣。

人講隔壁親家禮數原在，我感覺人佮人的感情毋管跋偌厚、偌深，仝款愛撙節家己的行為，毋通傷靠俗就變凊彩。啊若有誤會，嘛愛講出來，逐家鬥陣來解決，才袂出問題。

Q1 請問你敢捌佮同學冤家？是為著啥物代誌？請你講看覓。

Q2 請問你敢捌看著同學為著啥物代誌咧冤家？彼陣你有啥物想法？請你講看覓。

我毋捌佮同學冤家，因為我的個性較軟汫，較毋敢佮人大細聲，所以佇學校若有無歡喜的代誌，攏是目屎吞腹內，毋敢加講話。毋過我佇厝內會因為看電視的問題佮阮小弟起冤家，阮阿母就會罵阮是食飽傷閒，牛牢內咧相觸。

我捌看著同學因為一句話講了重耽，煞起冤家。彼是阮一个同學，伊去走標比賽著冠軍倒轉來，有幾若个同學就笑講：「好佳哉！你閣會曉走，冠軍才有你的份。」落尾彼个著獎的同學煞氣甲哭，𪜶就講是咧共呵咾。老師出來做公親講：「欲滾耍笑愛看款，才袂呵咾變剾洗。」彼陣我感覺真艱苦，因為阮同學明知影彼个同學讀冊攏吊車尾，就取一步𠢕走爾，所以彼陣我嘛感覺𪜶若像咧共人剾洗，誠無意思。